MAQSADIMIZ - TADBIRKORLARGA TAYaNCh BOʻLISh

Oʻzbekiston Respublikasi Prezidentining “Tadbirkorlik faoliyatini qoʻllab-quvvatlash va himoya qilish tizimini tubdan takomillashtirish chora-tadbirlari  toʻgʻrisida”gi 2019-yil 14-maydagi Farmoni ijrosini taʼminlash maqsadida tumanimizdagi Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasi tomonidan koʻpgina saʼy-harakatlar olib borilmoqda. Tadbirkorlik sohasidagi aniqlangan muammolarni tahlil qilish hamda ularni hal etish boʻyicha qabulxona huzurida tuman idoralarining vakillaridan iborat ishchi guruhi, shtab, vakolatli organlar vakillari, tumandagi faol tadbirkorlar, huquqshunoslar va tadbirkorlarning boshqa vakillaridan iborat Tadbirkorlar jamoatchilik kengashi faoliyat yuritmoqda.
2020-yil 1-oktyabrgacha qabulxona tomonidan hududlarda joylardagi muammolarni aniqlash va hal etishga koʻmaklashish maqsadida 32 ta sayyor qabullar tashkil etildi. Olib borilgan targʻibot-tashviqot ishlari hamda oʻtkazilgan suhbatlar davomida tadbirkorlik faoliyatini boshlash istagidagi fuqarolarga yoʻl-yoʻriqlar berildi.  Qabulxonada jami  250 ta masala boʻyicha 238 ta murojaatlar roʻyxatga olindi. Kelib tushgan murojaatlarning 7 tasi Respublika miqyosidagi, 84 tasi Qoraqalpogʻiston Respublikasi miqyosidagi, 147 tasi tuman miqyosidagi murojaatlar boʻlib, ularning 64 tasi oʻtkazilgan sayyor qabullar orqali, 89 tasi bevosita qabulxonaga murojaat qilish orqali, 90 tasi “Ishonch telefoni” (call markazi) orqali, 5 tasi business.gov.uz portali orqali elektron tarzda kelib tushgan.
Roʻyxatga olingan 238 murojaatlardagi 250 ta masalalardan 162 tasi qanoatlantirilgan, 84 tasiga tushuntirishlar berilgan, 4 tasi esa tegishli tashkilotlar tomonidan koʻrib chiqilmoqda.
Murojaatlar asosan kredit masalasida 65 ta, yer, kadastr va arxitektura qurilish masalalari boʻyicha 49 ta, infratuzilma masalalari boʻyicha 14 ta, boshqa masalalar boʻyicha 122 ta kelib tushgan.
Amudaryo tumanidagi Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasiga kredit olish boʻyicha  murojaat qilgan tadbirkorlarga tijorat banklaridan kredit mablagʻlari ajratilishiga amaliy yordam berildi.
Shu yilning 25-mart kuni tumanimizning Boʻz yop ovulida yashovchi “Koʻklan qoʻyboq” fermer xoʻjaligi rahbari Xudoybergenov Dilmurod Koʻklanovichning fermer xoʻjaligiga "Agrobank" Amudaryo filialidan naslli chorva mollari olish uchun 223 mln. soʻm miqdorida kredit olishga hujjatlarini topshirganligi, biroq hal boʻlmayotganligi yuzasidan bank tomonidan taʼminotchidan chorva mollarini olishga kafolat xati berilishida va kredit ajratilishida amaliy yordam soʻrab, murojaat qilgan edi. Murojaat yuzasidan Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasi tomonidan "Agrobank" Amudaryo filialidan soʻralgan kredit miqdori ajratilishiga amaliy yordam berildi.
Mangʻit shahrining Olmazor mahallasida yashovchi tadbirkor Sardor Matyoqubov esa 2 qavatli “Yoshlar mehnat guzari” binosini foydalanishga qabul qilish boʻyicha kadastr hujjatlarini olish uchun ovora boʻlayotganligini bildirib, qabulxonaga 2020-yil 21-yanvar kuni amaliy yordam soʻrab murojaat qilgan edi. Uning murojaati  ham koʻrib chiqilib, “Yermulkkadastr” DK Amudaryo tumani filiali tomonidan ijobiy hal etilishiga koʻmak berildi.
Qabulxona faoliyatida buningdek misollar juda koʻp. Bundan koʻzlangan asosiy maqsad esa mamlakatimiz iqtisodiyotida muhim oʻrin tutuvchi tadbirkorlarga tayanch boʻlish, ular uchrayotgan muammolarning qisqa muddatda bartaraf etilishiga yaqindan yordam berishdir.

M.OʻROZBOYeV, Amudaryo tumanidagi Oʻzbekiston Respublikasi Bosh vazirining

Tadbirkorlar murojaatlarini koʻrib chiqish qabulxonasi yetakchi mutaxassisi.