HARBIYLAR VA ChEGARAOLDI HUDUDI AHOLISI UChUN KONTsERT DASTURI NAMOYISh ETILDI

Oʻzbekiston Respublikasining  Davlat chegarasi toʻgʻrisidagi qonuni Davlat chegarasini belgilash, oʻzgartirish, himoya qilish va qoʻriqlash sohasidagi munosabatlarni tartibga soladi. Ushbu Qonunga amal qilinishini muntazam nazorat qilish, daxlsizligini saqlashda Chegara qoʻshinlarining xizmatlari beqiyosdir.

Tumanimizda faoliyat yuritayotgan 3-Chegarani qoʻriqlash vzvodi harbiy xizmatchilari, muddatli harbiy xizmat burchini oʻtayotgan askarlarga ham shunday taʼrif berish mumkin.

Shunisi eʼtiborliki, vzvod harbiy xizmatchilari, askarlarning oʻz burchlarini sadoqat bilan ado etishlari uchun barcha sharoitlar yaratilgan. Xizmatchilar xizmat uylari bilan taʼminlangan, oilalari bilan tinch-xotirjam yashashmoqda. Shuningdek, Prezidentimizning 2018-yil 4-avgustdagi “Oʻzbekiston Respublikasi Qurolli Kuchlari harbiy xizmatchilarining maʼnaviy-maʼrifiy saviyasini oshirish tizimini tubdan takomillashtirish toʻgʻrisida”gi Qarori asosida harbiy xizmatchilar va ularning oilalari uchun maʼnaviyatni yuksaltirish, milliy qadriyat va anʼanalarni chuqur oʻrganish, Vatanga muhabbatni oshirishni targʻib qiluvchi tadbirlar oʻtkazilib borilmoqda.

Yaqinda ushbu vzvod harbiy xizmatchilari va ularning oila aʼzolari, muddatli harbiy xizmat burchini oʻtayotgan askarlar, chegaraoldi hududida istiqomat qiluvchi aholining madaniy dam olishiga sharoit yaratish maqsadida 9-sonli Bolalar musiqa va sanʼat maktabida kontsert tashkil etildi. Kontsertda Davlat xavfsizlik xizmatiga qarashli Chegara qoʻshinlari “Sarhad” ashula va raqs ansambli ishtirokchilari oʻzlarining ozod va obod Vatan, uning himoyasi har bir harbiy chegarachi uchun muqaddas burch ekanligini, ona Vatanimizning har bir qarich yerini koʻz qorachigʻiday asrash lozimligini tarannum etuvchi kuy-qoʻshiqlarni yuksak mahorat bilan taqdim etdilar. Har bir ijro tomoshabinlar tomonidan olqishlandi.

Aslida mukammal yaratilgan va maromiga yetkazib ijro etilgan har bir kuy-qoʻshiq dillarga orom,  maʼnaviy ozuqa beradi. Lekin vatanparvarlik ruhidagi kuy-qoʻshiqlar yuraklarga kindik qonimiz tomgan shu aziz tuproqqa mehrimizni, muhabbatimizni oshirgani, uni asrash lozimligini singdirgani bilan juda ahamiyatlidir. “Sarhad” ansambli kontsert dasturi tomoshabinlarda ulkan taassurotlar qoldirdi, kunni-kun, tunni-tun demay chegaralarimizni sobit turib himoya qilayotgan, tinch-osoyishta hayot kechirishimizni taʼminlayotgan chegarachi harbiylarga hurmat-ehtirom hissini yuksaltirdi.

Fazliddin MAHAMADIYeV, 3-Chegarani qoʻriqlash vzodi xizmatchisi.