SUYuLTIRILGAN GAZ ENDILIKDA ONLAYN NAZORAT QILINADI

Amudaryo tumanda suyultirilgan gazdan foydalanuvchi 26233 ta aholi xonadoni mavjud. Tuman aholisiga 1 ta Xolimbeg servis markazi va 7 ta suyultirilgan gaz ballonlarni toʻldirish va qabul qilish shoxobchasi xizmat qilib kelmoqda. Undan tashqari uzoqda joylashgan 12 ta ovul va mahalla fuqarolar yigʻinlari aholisiga suyultirilgan gaz ballonlari olib borib berilmoqda. Sotuvda 1 kg. suyultirilgan gazning bahosi 1120 soʻm boʻlib, bir ballonga 20 kg. suyultirilgan gaz quyiladi.

Joriy yilning 15-oktyabridan boshlab, “Hududgaztaʼminot” AJ tomonidan respublika hududlari boʻylab, maishiy gaz ballonlariga shtrix kodli stikerlarni oʻrnatish ishlari boshlandi.

Isteʼmolchiga berilgan ID kartada barcha maʼlumotlar koʻrinib turadi. Bu bilan endi narx-navoni asossiz oshirish muammosi boʻlmaydi. Shu bilan birga bu tizimda gaz ballon tarqatish oraligʻi 45 kun boʻlsa, 45 kun ichida faqatgina bir marta pul yechib olinadi. Yaʼni, 45 kun ichida ikkinchi bor gaz ballon olishning imkoni yoʻq. Avtomatlashtirilgan tizimda belgilangan mablagʻ tegishli muddatda yechib olinadi. Yaʼni, haydovchi ekspeditor va taʼminotchi xodimlar tomonidan gaz ballon uchun qoʻldan naqd pul olinishiga yoʻl qoʻyilmaydi. Bu esa oʻz navbatida  suyultirilgan gaz taʼminotida koʻrsatilayotgan xizmat sifatini yanada oshirib, tizimdagi korruptsiya  holatlarini bartaraf etishga imkon beradi.

Har bir isteʼmolchi qabul qilib olayotgan suyultirilgan gaz balloni vaznini maxsus nazorat tarozilari orqali tekshirib olishlari uchun “Hududgaztaʼminot” aktsiyadorlik jamiyati tomonidan qulayliklar yaratilgan. Yaʼni, barcha avtotransport vositalari mana shunday nazorat tarozisi bilan taʼminlangan. Har bir maishiy gaz balloni boʻsh holdagi vaznidan tashqari 20 kg. suyultirilgan gaz bilan toʻldirilgan boʻlishi lozim. Agar ballonda 20 kg.dan kam gaz boʻlsa, isteʼmolchining ushbu ballonni olmaslikka qonuniy haqqi bor.

Suyultirilgan gaz isteʼmolchilarining xonadonlariga maishiy gaz ballonlarni oʻrnatib berish xizmati 3 ming soʻmni tashkil etadi. Yangi tartibga koʻra joriy etilayotgan mazkur xizmat ixtiyoriydir.

Qadamboy Matirzayev, “Amudaryotumangaz” gaz taʼminoti boʻlimi suyultirilgan gaz xizmati boshligʻi.