NOShIRLIK SOHASIDA YaNGILIK

Oʻzbekiston Respublikasi Prezidentining «Noshirlik va matbaa sohasini yanada rivojlantirishga oid qoʻshimcha chora-tadbirlar toʻgʻrisida» 2020-yil 16-martdagi PQ-4640-sonli qaroriga asosan, shuningdek, noshirlik va matbaa faoliyatini davlat tomonidan tartibga solish tizimini yanada takomillashtirish maqsadida Vazirlar Mahkamasining 2020-yil 22-iyun sanasida “Noshirlik va matbaa faoliyatini boshlagani haqida vakolatli davlat organini xabardor qilish tartibi toʻgʻrisidagi nizomlarni tasdiqlash haqida”gi 401-sonli qarori qabul qilindi.
Qaror bilan “Noshirlik faoliyatini boshlagani haqida xabardor qilish tartibi toʻgʻrisidagi nizom” tasdiqlangan boʻlib, nizom  yuridik shaxslar tomonidan noshirlik faoliyatini boshlagani haqida Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligini xabardor qilish tartibini belgilaydi. Nizom davlat hokimiyati va boshqaruv organlari, sudlar, prokuratura organlari tomonidan rasmiy materiallar, normativ hujjatlar toʻplamlari va boshqa hujjatlarni nashr etishga, respublika ahamiyatiga ega boʻlgan nodavlat va notijorat tashkilotlari, shuningdek, korxonalar, tashkilotlar, oʻquv va ilmiy muassasalar tomonidan oʻz faoliyati uchun zarur boʻlgan va qoʻlyozma huquqlari bilan ommaviy ravishda tarqatish yoki koʻpaytirish uchun moʻljallanmagan materiallarni nashr etishga nisbatan tatbiq etilmaydi.
Noshirlik faoliyatining ixtisoslashuvlari quyidagilar, Ijtimoiy-siyosiy nashrlar, adabiy-badiiy nashrlar, bolalar va oʻsmirlar nashrlari, maʼnaviy-maʼrifiy nashrlar, ilmiy nashrlar, ilmiy-ommabop nashrlar, oʻquv adabiyotlari, entsiklopedik (maʼlumotnoma) nashrlar, rasmiy nashrlar, diniy nashrlar, axborot-reklama nashrlari, ishlab chiqarishga oid nashrlar, ishlab chiqarishga oid nashrlardan biri qilib belgilangan.
Noshirlik faoliyatini boshlagani haqida vakolatli davlat organi oʻn kun ichida yuridik shaxsning rahbari tomonidan davlat xizmatlari markazlari yoki Oʻzbekiston Respublikasi Yagona interaktiv davlat xizmatlari portali  orqali xabardor qilinadi. Noshirlik faoliyatini boshlagani haqida vakolatli organni xabardor qilmaslik qonunchilikda belgilangan tartibda yuridik va jismoniy shaxslarning javobgarligiga sabab boʻladi. Noshirlik faoliyatini boshlagani haqida vakolatli davlat organni xabardor qilish uchun yigʻim va davlat boji undirilmaydi.
Shuning bilan birga ushbu qaror bilan “Matbaa faoliyatini boshlagani haqida xabardor qilish tartibi toʻgʻrisida nizom” ham tasdiqlangan. Nizom yuridik va jismoniy shaxslar tomonidan matbaa faoliyatini boshlagani haqida Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligining Qoraqalpogʻiston Respublikasi, viloyatlar va Toshkent shahar axborot va ommaviy kommunikatsiyalar hududiy boshqarmalarini  xabardor qilish tartibini belgilaydi.
Matbaa faoliyatining ixtisoslashuviga koʻra, bosma mahsulotlarning qoliplarini tayyorlash, ofset usulida chop etish, flekso usulida chop etish, bosma qoliplarsiz chop etish, trafaret yoki shoyitrafaret usulida chop etish, brayl usulida chop etish, tayyor mahsulotlar va materiallarga bosish, chop etishdan keyingi jarayonlar va muqovalashlar ajratilishi belgilangan.
Matbaa faoliyatini boshlagani haqida vakolatli davlat organi oʻn kun ichida yuridik shaxsning rahbari yoki yakka tartibdagi tadbirkor tomonidan davlat xizmatlari markazlari yoki Oʻzbekiston Respublikasi Yagona interaktiv davlat xizmatlari portali orqali xabardor qilinadi.  Xabarnomaga matbaa korxonasida oʻrnatilgan yoki oʻrnatilishga moʻljallangan matbaa uskunalarining roʻyxati ilova qilinadi. Matbaa faoliyatini boshlagani haqida vakolatli organni xabardor qilmaslik qonunchilikda belgilangan tartibda yuridik va jismoniy shaxslarning javobgarligiga sabab boʻladi. Matbaa faoliyatini boshlagani haqida vakolatli davlat organini xabardor qilish uchun davlat boji undirilmaydi.

Nazokat Alliyazova, tuman Davlat xizmatlari markazi aloqa operatori.